LO SMARTPHONE
Tanti ani fa al comunicar co’ amici o parenti lontani
ma anca vizini, le noze, i funerai o i compleani
se lo fea co letere, bilieti e cartoline de la posta
par meterse dacordo su na question o su na festa.
Che adès le robe le sia cambiade l’avon tuti in mente
ben savendo tut quel che alora l’era normal par la gente.
Ma la realtà che ancò tuti vivon
al è al destin che a ciapar le decision
la sia na roba picenina picenina
nata veramente in sordina.
Al responsabile sempre presente
de grado supremo, vile e prepotente
al è al telefonin, batezà su tuta la tera
smartphone o in qualche altra strana maniera.
Ti no tu poderà mai abandonarlo
parchè al è pedo de an tarlo
che te cambia al destin
sto arnese tanto mingherlin.
Pareria che andando avanti
quel telefono, che ti tu credea innocente,
al deventese adiritura onipotente
sostituiendo, tut su na olta , la posta, la banca, al giornal
le boteghe vece e famose, al dugo e ogni altro bacanal,
Ma anca al tò laoro, stà ben atento a questa frase,
parchè, tant importante, anche lù al cambierà de base:
Ti tu laorerà restando casa toa parchè al sistema in atto
al te colegherà via etere con qualunque manufatto
coi so colori, col sonoro e pian pian ancha col odor
de la roba che ti tu costruis senza gnanca dover
andar mai a tocarla co le to man davanti al viso.
A sto punto tu pol proprio dir che è rivà in tera al paradiso
co tute le so meraviglie, telefonin, lavoro, divertimento.
Inveze le ora che mi stesso, dal paradiso, torne in tela tera
e, asando da parte ogni chimera,
deve dirte, col cor sgionf, che in te la realtà
ti tu se ormai prigionero de la modernità:
Al smartphone minuscolo e legero
al te è entrà in tel zervel e in te le vene
misià col sangue senza che ti tu senta mal o bene.
Ti ormai, come no tu pol star senza al sangue vital,
cusì no tu sarà mai bon de privarte de quela tal
minuscola robeta parchè co grande indiferenza
e sovratuto senza ciapar conosenza
e senza poder mai pì tornar indrio
ti tu à pers tut quel pi bel che te avea dat iddio :
al gran dono de fradei e amici che i te stà intorno
occupà come che tu sè a telefonar tut al giorno
de sera e de matina, in treno, in machina
in sala de concerto o in giardin su na pachina
sempre col telefonin in man come che al fuse deventà
la prolunga de la recia che, in verità,
la par sorda come an campanon
parchè ti non tu a pi temp a to disposizion
par scoltar, come che fuse gnent ,
quel che, se i podese, te conteria i tò amici e i tò parent.