Mi e Bepi ben pochi ani se avea fat
quando che par strada come i mat.
se fea dei dughi veramente bei.
Fra tuti quanti ne piasea quei,
che i avea la so bela conclusion.
e fea vinzer quel tosat che co passion
l’avea ciapà balete de teracota tant bele,
e pesanti da sfondaene le scarsele
An bel di mi e Bepi avon inventà
an dugo novo che avon batezà
“ senza fine” parche no ghe n’era
conclusion in nessuna maniera.
Ala fin del dugo ognun de noaltri dò
al ndea via saludando quel’altro cò
la parola strana “trec” e solamente quela.
La regola la era cusi fata e bela
che vinzea quel che riuscia a dir sec
e par ultimo, questa parola magica: “trec”
Ma capitea sempre che quel’altro nol se desmenteghea
e anca lù svelto svelto “trec” al ripetea
deventando subito l’ultimo e quindi al novo vincente.
Del fato, portà all’infinito, se capis la fine inesistente.
E’ pasà setanta ani ed anca ades
mi e Bepi se saludon col “trec” molto spes
senza però che ancora no esista soluzion
parche no se aceta gnanca ancò la solita question.
Mi pense che la disputa la poderà vegnir risolta sol alora,
tra molti ani, che un al compagnerà quel altro a la so ultima dimora.
Però son convinto che al “senza fine” resterà perfeto
parche sarà alora inevitabile star ziti par rispeto
de chi che no al sarà in grado de parlar più
e nol poderà gnanca saver che al vincitor nol pol pi eser lù.